Bóluefnið komi of seint

Þeir þrír einstaklingar sem smitaðir eru, hafa allir dvalið í Suður Ameríku að undanförnu. Heilbrigðisyfirvöld í Noregi hafa hvatt alla til að setja sig í samband við lækni sé uppi minnsti grunur um smit en alls eru níutíu manns undir sérstöku eftirliti þar í landi. Veiran hefur komið upp víða í Evrópu, í Bandaríkjunum og í Asíu. Langflestir hafa þó smitast í Suður Ameríku. Allt kapp er lagt á að móteitur og bóluefni verði almenningi aðgengileg sem fyrst en á fundi hjá alþjóðaheilbrigðisstofnuninni fyrr í vikunni var greint frá því að enn sé of langt í land.

„Þróun bóluefnis er enn á frumstigi, og þau efni sem lengst eru komin eiga enn nokkra mánuði efti áður en fyrstu prófanir á fólki hefjast. Það er því mögulegt að bóluefni komi of seint fyrir núverandi faraldur í Suður-Ameríku, en þróun bóluefnis er samt nauðsynleg og sérstaklega bóluefni sem hentar þunguðum konum og konum á barneignaraldri,“ sagði Marie-Paule Kieny, aðstoðarforstjóri Alþjóðaheilbrigðisstofnunarinnar (WHO).