Geir bætti Janusi Daða inn í landsliðshópinn

Geir Sveinsson og Óskar Bjarni Óskarsson hafa kallað á Haukamanninn Janus Daða Smárason inn í æfingahóp A landsliðs karla.

Geir og Óskar Bjarni eru að vinna með sama hóp og spilaði leikina gegn Noregi í byrjun vikunnar en þeir Guðjón Valur Sigurðsson og Aron Pálmarsson bættust við þegar liðið kom heim til æfinga.

Janus Daði Smárason kemur inn fyrir Snorra Stein Guðjónsson sem meiddist í seinni leiknum á móti Norðmönnum í Þrándheimi í vikunni.

Janus Daði Smárason hefur átt frábært tímabil með deildarmeisturum Hauka en hann skorað 175 mörk í 27 leikjum í deildarkeppninni eða 6,5 mörk að meðaltali í leik.

Janus Daði Smárason hefur leikið einn A-landsleik fyrir Ísland en hann var með íslenska liðinu í æfingaleik á móti Portúgal í Kaplakrika 7. janúar 2016.