Lægsta boð 59% af áætlun

Fyrirtækið Metalogalva í Portúgal átti lægsta tilboðið í stálmöstur þriggja háspennulína Landsnets, Kröflu­línu 4, Þeistareykjalínu 1 og Suðurnesja­línu 2, en alls bárust fimmtán tilboð í möstrin og voru tólf þeirra undir kostnaðaráætlun.

Metalogalva bauð tæpar 3,2 milljónir evra, eða 465 milljónir íslenskra króna, um 59 prósent af kostnaðaráætlun.

Landsnet mun nú fara yfir tilboðin og í framhaldi af því verður rætt við lægstbjóðendur.

Gert er ráð fyrir að möstur Kröflulínu 4, frá Kröflu að Þeistareykjum, komi til landsins í sumar en möstur Þeistareykjalínu 1, frá Þeistareykjum að Bakka, og Suðurnesjalínu 2, milli Hafnarfjarðar og Rauðamels á Reykjanesi, verði afhent í byrjun næsta árs. 

Fréttin birtist fyrst í Fréttablaðinu 13. apríl