Birta lista yfir kaup­endur: Á annað þúsund keypti fyrir tuttugu milljónir

Í tilkynningu á vef Stjórnarráðsins segir að í framhaldi af útboði á almennum hlutum í Íslandsbanka hf. birti fjármála- og efnahagsráðuneytið hér með sundurliðaðar upplýsingar um hver og ein viðskipti með eignarhluti, það er kennitölur og nöfn endanlegra kaupenda og kaupvirði í samræmi við ákvæði laga um sölu hlutar ríkisins. Meðal markmiða laganna hafi verið að tryggja gagnsæi við framkvæmd útboðsins.

Lista yfir kaupendur í tilboðsbók A, sem aðeins einstaklingar máttu skrá sig í, má sjá hér. 

Stærri fjárfestar máttu skrá sig fyrir hlutum í tilboðsbók B. Listann má sjá hér. 

Á þeim lista eru aðeins 56 kaupendur. Ríflega 30 þúsund einstaklingar skráðu sig hins vegar fyrir hlutum í bók A.

Í tilkynningunni segir að heildareftirspurn útboðsins hafi numið um 190 milljörðum króna og heildarvirði þess kr. 90.576.003.783. Í tilboðsbók A hafi 815.670.603 hlutum verið úthlutað til 31.021 einstaklinga. Tilboð í tilboðsbók B hafi numið 84,3 milljörðum króna og 34.329.404 hlutum hafi verið úthlutað til 56 aðila. Fjöldi tilboða sem bárust í tilboðsbók B hafi verið 1.228.

Tilboðum undir 117,5 krónum hafnað en verðið endaði í 106,56 krónum

Úthlutun í tilboðsbók B hafi farið fram á grundvelli úthlutunarreglna í lögum um söluna, sem kveði á um að skerðing tilboða vegna umframeftirspurnar skuli eingöngu gerð á grundvelli tilboðsverðs. Þannig hafi fyrst verið úthlutað til hæstu tilboðsverða þar til öllum eftirstandandi hlutum hafði verið úthlutað.

Á grundvelli úthlutunarreglna laganna hafi öllum tilboðum að fjárhæð kr. 117,55 á hlut eða hærra úthlutað óskert en tilboð að fjárhæð kr. 117,50 á hlut skert hlutfallslega. Tilboðum undir kr. 117,50 á hlut hafi verið hafnað.

Söluverð í tilboðsbók B hafi verið kr. 106,56 á grundvelli laganna, þar sem tilboð í tilboðsbók A hafi náð grunnmagni útboðsins.

Útboðinu sé nú lokið þar sem öllum 850.000.007 útboðshlutum hafi verið úthlutað til fjárfesta í tilboðsbók A og tilboðsbók B.

Útboðið marki kaflaskil

„Meginreglur útboðsins um gagnsæi, hlutlægni, jafnræði og hagkvæmni skiluðu vel heppnuðu útboði fyrir ríkissjóð. Góð þátttaka í útboðinu endurspeglar traust almennings á ferlinu og framkvæmdinni. Útboðið markar ákveðin kaflaskil þar sem ríkissjóður er ekki lengur hluthafi í bankanum og dregur úr þeirri áhættu sem felst í eignarhaldi á fjármálafyrirtækjum. Með sölunni styrkjum við stöðu ríkissjóðs og búum til svigrúm til þess að ráðast í nauðsynlegar innviðafjárfestingar,“ er haft eftir Daða Má Kristóferssyni, fjármála- og efnahagsráðherra.