Curry verður væntanlega með í dag

Stephen Curry snýr væntanlega aftur í lið Golden State Warriors þegar það sækir Houston Rockets heim í 8-liða úrslitum Vesturdeildarinnar í NBA í dag.

Curry sneri sig á ökkla í fyrsta leik liðanna fyrir viku og lék ekkert með í öðrum og þriðja leiknum.

Hann tók hins vegar þátt í æfingu Golden State liðsins í fyrradag og sagði að það væri yfirgnæfandi líkur á að hann yrði með í leiknum í dag.

Golden State vann tvo fyrstu leikina á heimavelli en tapaði þriðja leiknum í Houston á fimmtudaginn. Golden State hefur ekki tapað tveimur leikjum í röð í vetur en liðið setti met með því að vinna 73 leiki í deildakeppninni.

Curry var stigahæsti leikmaður NBA-deildarinnar í vetur með 30,1 stig að meðaltali í leik. Hann náði einnig þeim merka áfanga að vera með yfir 50% skotnýtingu, 45% þriggja stiga nýtingu og 90% vítanýtingu.