Allir mega syngja með

Nýlega stofnaður Rokkkór Íslands stendur fyrir tónleikunum 80´s Rokk partý! næsta föstudag í Bæjarbíói í Hafnarfirði. Tónleikarnir verða þó ekki með hefðbundnu fyrirkomulagi því tónleikagestum er velkomið að syngja með og standa upp úr sætunum enda um svokallaða „sing a long“ tónleika að ræða sem njóta sívaxandi vinsælda.

Meðal flytjenda sem Rokkkórinn tekur fyrir eru ýmsar stórstjörnur frá níunda áratug síðustu aldar, flytjendur á borð við AC/DC, Bon Jovi, Kiss, Meatloaf, U2, Whitesnake, Bonnie Tyler og Eurythmics og því hægt að lofa miklu fjöri segir Matthías V. Baldursson, skipuleggjandi tónleikanna og stjórnandi Rokkkórsins.

„Tónleikarnir verða byggðir upp sem hálgert partí. Barinn verður opinn og gestir mega alveg standa upp og kíkja þangað hvenær sem er. Það verður lítið um formlegheit enda markmiðið bara að skemmta sér saman. Textum laganna verður varpað upp á skjáinn fyrir tónleikagesti svo allir geti tekið undir og sungið með. Væntingar okkar eru þær að gestir skemmti sér jafn vel og við og eigi frábæra kvöldstund með Rokkkórnum enda eru Íslendingar þekktir fyrir að vilja syngja mikið og hafa gaman af söng af ýmsum gerðum.“

Metnaður og sönggleði

Rokkkór Íslands var stofnaður í apríl á síðasta ári og fagnar því eins árs afmæli um þessar mundir. „Nokkrir vinir mínir þrýstu á mig að búa til kór sem væri skipaður vönu söngfólki sem langaði að takast á við krefjandi verkefni í tónlist og hafa gaman saman. Ég sló til og úr varð þessi flotti kór. Aðsókn í hann varð strax mjög mikil og í dag er hann skipaður rúmlega 30 manns sem flest eiga það sameiginlegt að hafa yfir áratuga reynslu í popp-, rokk- og dægurlagasöng. Metnaður, sönggleði ásamt toppgæðum eru mottó okkar.“

Rokkkórinn hélt fyrstu tónleika sína í Hörpu í febrúar og þar kviknaði hugmyndin hjá einum kórmeðlimi, að halda „sing a long“ rokktónleika með lögum frá þessu tímabili. „Prógram okkar í Hörpu var byggt upp á þekktum lögum frá níunda áratugnum og var stemmingin í salnum svo mikil að við ákváðum að láta þetta verða að veruleika. Áhorfendur voru æstir að syngja með og nú gefst fólki heldur betur tækifæri til þess.“

Lagavalið var því ekki flókið ferli að sögn Matthíasar. „Við notumst að mestu leyti við sömu lög og við sungum í febrúar. Það sem helst þarf að hafa í huga er að vera með lög sem flestir þekkja og hafa gaman af. Prógram okkar á föstudag einkennist svo sannarlega að því.“

Stefnt á frekari útgáfu

Auk tónleikanna á föstudag er ýmislegt framundan að sögn Matthíasar. „Við erum byrjuð að undirbúa næstu tónleika sem verða í haust en þar verður tónlist frá áttunda áratug síðustu aldar aðal þemað. Einnig er stefnt að því að fara í hljóðver og taka upp nokkur lög. Rokkkórinn er nú þegar búin að gefa út þrjú lög sem komin eru á netið og útgáfa geisladisks er á dagskránni innan tveggja ára. Einnig erum við að fara að taka þátt í mjög stóru söngleikjaverkefni en ekki er hægt að greina frá því strax.“

Einsöngvarar á tónleikunum verða þau Davíð Smári Harðarson, Telma Ágústsdóttir, Íris Kristinsdóttir, Georg Alexander, Áslaug Helga Hálfdánardóttir, Áslaug Fjóla Magnúsdóttir, Óli Már, Katrín Hildur Jónasdóttir, Kristjana Þórey Ólafsdóttir, Kristbjörg Kari Sólmundsdóttir og Brynhildur Jónsdóttir. Matthías spilar á hljómborð og stýrir kórnum. Auk hans skipa hljómsveitina feðgarnir Davíð Sigurgeirsson og Sigurgeir Sigmundsson sem spila á gítara, Þorbergur Ólafsson leikur á trommur og Þórir Rúnar Geirsson leikur á bassa.

Tónleikarnir verða í Bæjarbíói í Hafnarfirði föstudaginn 22. apríl og hefjast kl. 22.

Nánari upplýsingar má finna á facebook undir 80´s rokk partý auk þess sem Rokkkórinn er á facebook. Rokkkórinn er einnig með YouTube rásina Rokkkór Íslands þar sem hlusta má á nokkur tóndæmi, þ.á.m. þetta hér.