Heimir: Sumir sprengdu skalann

„Auðvitað var tilfinningin góð. Sérstaklega þar sem við gerum okkur fulla grein fyrir styrkleika Portúgals. Við viljum sýna þeim þá virðingu sem þeir eiga skilið,“ sagði Heimir Hallgrímsson, annar landsliðsþjálfari Íslands, á blaðamannafundinum eftir leikinn gegn Portúgal í kvöld.

Leiknum lyktaði með 1-1 jafntefli eins og alþjóð veit en Birkir Bjarnason skoraði jöfnunarmark Íslands snemma í síðari hálfleik.

„Portúgal var meira með boltann og voru hættulegri. Það er erfitt að spila gegn Portúgal enda erum við sannfærðir um að þeir séu með eitt besta lið keppninnar. Portúgal mun ná mjög langt.“

„Þess vegna er þetta svona góð frammistaða. Við náðum að stöðva svo margt í þeirra spili. Við vorum afar skipulagðir og fyrir utan 1-2 atvik þá vorum við einbeittir og agaðir. Þetta var liðssigur og það er erfitt að ætla að taka einhvern einn úr okkar liði. Strákarnir fá mikið hrós.“

„Og tilfinningin er góð. Nú getum við farið aðeins afslappaðri í næsta leik,“ sagði Heimir enn fremur.

Hann segir að það hafi verið lagt upp með að fara rólega í leikinn og setja langa bolta á Portúgal. Kolbeinn hafi unnið marga bolta en að strákarnir hafi ekki verið nógu duglegir að vinna þann síðari.

„Við töpuðum boltanum of fljótt eftir að hafa unnið hann. Við þurftum að gefa okkur meiri tíma til að ná andanum á milli sókna Portúgals og vera rólegri með boltann,“ sagði hann enn fremur.

Hannes Þór Halldórsson var valinn maður leiksins í jöfnu íslensku liði af blaðamönnum Vísis en Heimir vildi samt ekki hæla honum fremur en öðrum.

„Það væri ósanngjarnt að taka einhvern út. Hann átti mjög góðan leik eins og svo margir aðrir. Það væri til dæmis mjög gaman að fara yfir hlaupatölurnar. Það eru margir sem tóku skrefamælinn og sprengdu skalann. Það verða einhverjir með harðsperrur á morgun.“

„Það eru allir þreyttir en enginn meiddur. Nú förum við í endurhæfingu og endurheimt. Við sjáum svo til á morgun og hinn. En ég held að nú sé gleðin öðru yfirsterkari, sérstaklega þreytu.“

Hann sagði að íslenska liðinu hefði liðið eins og að það væri á heimavelli, slíkur var stuðningurinn úr stúkunni.

„Þetta var eins og heimaleikur. Stuðningsmenn voru ótrúlegir. Þetta var eins og að spila heima. Þá leið okkur mjög vel.“

Hann segir að það sé engin sérstök leið til að stöðva sóknarmenn Portúgals, Ronaldo og Nani, eins og Ísland gerði í kvöld.

„Það er ekki hægt að setja einn mann á Ronaldo. Þetta verður að vera liðsvinna. Það verður að vera gott skipulag og menn verða að loka svæðum. Þetta var virkilega gott og vel að verki staðið hjá strákunum.“