EM dagbók: Ég hafði engan eins og Lars

Er hægt að fresta EM um tvær vikur?

Ég hef oft hugsað til þess síðustu vikurnar að það væri fínt að ýta mótinu aftur um fáeina daga, kannski 1-2 vikur. Ég, eins og reyndar öll íslenska þjóðin, er í raun að renna blint í sjóinn þegar kemur að aðkomu minni að EM í Frakklandi sem fjölmiðlamaður. Tilhlökkunin fyrir mótið er auð­vitað mikil en stressið er sannarlega líka fyrir hendi.

Ég hef þó orðið þeirrar gæfu aðnjótandi að fá að upplifa ýmislegt. Ófáa landsleiki á erlendri grundu, Ólympíuleika, stórmót í handbolta og aðra stóra viðburði. Ég var líka með U-21 strákunum í Danmörku á sínum tíma. En það er einfaldlega svo að ekkert af þessu er í líkingu við þátttöku A-landsliðs karla í lokakeppni stórmóts.

Það hefur verið að gríðarlega mörgu að huga. Við þurfum að gera mótinu skil í sjónvarpi, blaði, útvarpi og á neti og okkur er það mikið kappsmál að færa stemninguna til okkar áhorfenda, lesenda og hlustenda eins vel og kostur er.

Það hafa verið haldnir margir fundir. Það hafa verið sendir ótal tölvupóstar. Málin hafa verið rædd formlega og óformlega. Spurningum hefur verið dembt á þolinmóða starfsmenn KSÍ og hár hefur verið reytt yfir gríðarlega þungu og ströngu ferli sem fylgir því að verða sér úti um fjölmiðlapassa á EM og leiki Íslands.

Í fyrradag héldum við einn lokafund með EM-hópi okkar og því starfsfólki sem mun sjá um að taka á móti efninu okkar hér heima. Ótrúlegt nokk fannst mér að það hafi tekist að ræða öll þau mál sem hægt var að ræða. Svo verður bara að koma í ljós hvernig þetta verður allt saman – hvort áætlanir okkar gangi eftir og þær hugmyndir sem við höfum geti orðið að veruleika. Við verðum bara að sjá til því ekkert okkar hefur jú gert þetta áður.

Ég hef það á tilfinningunni að þetta sé að einhverju leyti svipað með íslenska landsliðið – strákana okkar sem ætla sér svo stóra hluti á EM. Langt og strangt undirbúningsferli er að baki, þeir hafa gert allt sem þeir geta til að halda sér heilum og tilbúnum í slaginn. Svo bara halda þeir út í stóra daginn þegar hann rennur upp og bæði vona og gera sitt besta.

Ég hafði þó engan reynslubolta sem hefur fjallað um mörg stórmót í fótbolta til að segja mér til og gefa mér ráðleggingar. Landsliðið hefur Lars Lagerbäck og mikilvægi hans í landsliðinu hefur aldrei verið meira en nú. Það ætti að róa taugar strákanna.

EM byrjar í dag og keppninni verður ekki frestað. Við erum mætt til Frakklands og klár í slaginn, hvað svo sem tekur við, og ég veit að strákarnir eru það líka. Fylgist með okkur í öllum okkar miðlum en einnig samfélagsmiðlum (VisirSport á Facebook og Twitter – sport365 á Snapchat) og fáið EM-stemninguna beint í æð!