Sjáðu fallegt mark Viðars á Vinavöllum | Myndband

Viðar Örn Kjartansson, framherji Malmö í sænsku úrvalsdeildinni í fótbolta, hefur verið sjóðheitur fyrir framan markið að undanförnu og hann heldur áfram að skora.

Selfyssingurinn kom Malmö í 1-0 á Friends Arena í leik gegn Hauki Heiðari Haukssyni og félögum í AIK í dag, en Viðar Örn skoraði með fallegu skoti úr teignum á 15. mínútu.

AIK jafnaði metin áður en hálfleikurinn var á enda, en með sigri nær Malmö fimm stiga forskoti á toppi sænsku úrvalsdeildarinnar.

Viðar Örn er nú búinn að skora sex mörk í síðustu fimm leikjum fyrir Malmö í deildinni en hann setti þrennu gegn Östersund í lok maí. Hann er í heildina búinn að skora núna níu mörk í þrettán leikjum.

Markið huggulega sem hann skoraði í dag má sjá í spilaranum hér að neðan eða með því að smella hér.