Hjart­næm stund í Hamingjunni: Ingvar tók við Íslandsskildinum

Víkingar gerðu 2-2 jafntefli við Fram í lokaleiknum en voru fyrir nokkrum vikum búnir að tryggja sér Íslandsmeistaratitilinn annað árið í röð.

Ingvar varð að hætta að spila með Víkingum fyrr í sumar þegar hann greindist með illkynja krabbamein.

Víkingar tilkynntu strax að þeir myndu styðja þétt við bakið á Ingvari og fjölskyldu hans í þessu erfiða verkefni og hann fékk síðan nýjan samning hjá félaginu.

Leikmenn Víkings klæddust sérstakri treyju í leiknum gegn Fram í dag og treyjurnar fara síðan á uppboð þar sem allur ágóði rennur óskiptur til Ingvars og fjölskyldu hans.

Ingvar var líka heiðraður fyrir leikinn og eftir hann var Ingvar kallaður fram í verðlaunaafhendingunni. Hann tók við Íslandsskildinum ásamt fyrirliðanum Oliver Ekroth og Gylfa Þór Sigurðssyni, nýkrýndum leikmanni ársins.