Höskuldur segir Sigmund Davíð setja allt í upplausn

Höskuldur Þórhallsson, þingmaður Framsóknarflokksins, segir að orð Sigmundar Davíðs Gunnlaugssonar um að ekki liggi á að halda þingkosningar í haust sé til þess eins fallið að „koma í veg fyrir þá mikilvægu vinnu sem framundan er í þinginu og setja þar allt í upplausn.“

Höskuldur lætur orðin falla á Facebook-síðu sinni og segir að slíkt myndi einnig sprengja ríkisstjórnina og þar með færu mörg mál í súginn.

Panama-lekinn

Í færslunni fjallar Höskuldur um bréf formanns Framsóknarflokksins til félagsmanna flokksins.

„Í kjölfar Panamaskjalanna þar sem upplýst var um spillingu, leynd, skattsvik fjölmargra einstaklinga, sagði þáverandi forsætisráðherra af sér. Í kjölfarið samþykkti þingflokkur Framsóknarflokksins það skilyrði Sjálfstæðismanna að kosningar yrðu haldnar í haust gegn því að Sjálfstæðisflokkurinn féllist á að Framsóknarflokkurinn skipaði áfram forsætisráðherra úr sínum röðum. Á það féllst Sjálfstæðisflokkurinn og Sigurður Ingi Jóhannsson tók við af formanni flokksins,“ segir í færslunni.

Samkomulagið

Höskuldur segir að þingflokkur Framsóknar hafi sett þetta skilyrði ekki síst til að tryggja „að unnt væri að halda áfram vinnu við og klára mikilvæg mál á borð við húsnæðisfrumvörp, afnám hafta, mikilvægar samgöngubætur auk fleiri mála sem listuð voru upp í samkomulaginu.“

Forsætisráðherra mjög á móti skapi

Þingflokkur Framsóknar hafi unnið í samræmi við þetta samkomulag þrátt fyrir að Höskuldi og mörgum finnist það súrt í broti að ekki verði hægt að ljúka ýmsum öðrum málum sem við teljum einnig mikilvæg.

„En ég lít svo á að ekki komi annað til greina en að standa við það samkomulag sem gert var. Ég er ekki einn um þá skoðun í þingflokknum - og bendi m.a. á orð Sigurðar Inga Jóhannssonar forsætisráðherra, sem sagði í tilefni þeirrar atburðarásar sem formaðurinn hefur hrundið af stað, að hann væri „vanur því að standa við orð sín“. Ég dreg þá ályktun að nýjasta atburðarásin sé forsætisráðherra mjög að móti skapi.“

Höskuldur lýkur færslunni á að segja að á meðan nákvæm dagsetning kjördags liggi ekki fyrir muni áfram ríkja óvissa um það hvort flokkarnir eigi að halda flokksþing og raða fólki á lista þó að flestir séu vel á veg komnir með þá vinnu.

„Það er þó ekki ástæða til að efast um að næstu þingkosningar fari fram í vetrarbyrjun þótt enn sé óljóst með nákvæma dagsetningu,“ segir Höskuldur.