Fatastíll Celine Dion vekur verðskuldaða athygli

Það hefur ekki farið framhjá neinum tískuáhugamanni að á seinustu misserum hefur söngkonan Celine Dion verið að klæða sig óaðfinnanlega. Ástæðan fyrir því er að hún réð til sín nýjan stílista í byrjun sumars en sá heitir Law Roach. Hann var á dögunum ráðinn sem einn af nýjum dómurunum í næstu America's Next Top Model seríu. 

Celine hefur verið að koma víðsvegar fram og að taka upp ný tónlistarmyndbönd. Það er greinilegt að hún hafi verið tilbúin fyrir breytingar í fataskápnum en hingað til hefur hún verið að klæðast hefðbundnari fötum. Núna er hún óhrædd við að rokka leður síðkjól og pallíettu jakkaföt. 

Þrátt fyrir að hafa gengið í gegnum gríðarlega erfiða tíma fyrr á árinu þar sem hún missti bæði eiginmann sinn og bróður með tveggja daga millibili þá lítur hún út fyrir að vera að komast aftur á skrið. Það verður spennandi að fylgjast með henni á næstu mánuðum.