Bretar hafa ekki upplifað svona mikinn samdrátt síðan árið 2009

Efnahagur bresku þjóðarinnar hefur ekki verið verri í sjö ár vegna ákvörðunarinnar um að yfirgefa Evrópusambandið. Mælingar á hagvexti í landinu gefa til sýna mikinn samdrátt en ástandið hefur ekki verið svona slæmt í síðan í apríl árið 2009, að því er fram kemur á vef fréttastofu breska ríkisútvarpsins BBC.

Bæði aðilar í framleiðslustörfum og þjónustustörfum hafa þurft að horfa upp á mikinn samdrátt en útflutningur hefur hins vegar aukist samhliða hruni á gengi pundsins.

IHS Markit framkvæmdi könnun á meðal 650 breskra fyrirtæki til að ná utan um ástandið en spurt var hvort viðskipti standi í stað, væru meiri eða minni miðað við síðasta mánuð. Einnig var spurt hvort framleiðni aukist eða dregið úr henni.

Chris Williamson, hjá IHS Markit, segir við BBC eða um sé að ræða gríðarlega hnignun sem rekja megi til Brexit. 

„Einu skiptin sem við höfum séð svona lág gildi var í efnahagshruninu árið 2008 og 2009, þegar netbólan sprakk og Asíukreppan árið 1998. Munurinn nú er sá að vandamálið er algjörlega heimatilbúið,“ er haft eftir Williamson sem segir þetta ástand vera nákvæmlega það sem hagfræðingar vöruðu við fyrir þjóðaratkvæðagreiðsluna þar sem Bretar völdu að segja skilið við Evrópusambandið.