Juventus hafnaði 85 milljóna punda tilboði United í Pogba

Juventus hafnaði tilboði enska úrvalsdeildarliðsins Manchester United í Paul Pogba sem hljóðaði upp á 100 milljónir evra eða 13,7 milljarða íslenskra króna, samkvæmt heimildum Sky Italia.

Tilboðinu var hafnað í gær en forráðamann Juventus eiga að hafa sagt kollegum sínum hjá Manchester United að 100 milljóna punda tilboð er eitthvað sem ítalska félagið getur sætt sig við. Það eru 16 milljarðar íslenskra króna og væri mesta fé sem nokkurt lið hefur borgað fyrir leikmann.

Juventus hefur víst sætt sig við að franski landsliðsmaðurinn vill fara en Tórínófélagið ætlar sér að græða vel á Pogba sem hefur orðið ítalskur meistari með Juventus undanfarin fjögur ár og sló í gegn með Frökkum á EM.

Ed Woodward, stjórnarformaður Manchester United, Mino Raiola, umboðsmaður Pogba, og Giuseppe Marotta, framkvæmdastjóri Juventus, sátu fund í gær þar sem Woodward gerði ítalska félaginu þetta risatilboð í leikmanninn sem er í sumarfríi og snýr ekki aftur til Tórínó fyrr en sjötta ágúst.

Það virðist nokkuð augljóst að Paul Pogba er fjórði leikmaðurinn sem José Mouriho, nýr knattspyrnustjóri Manchester United, talaði um að hann vantaði á fyrsta blaðamannafundi sínum. Hann var þá búinn að kaupa Henrikh Mkhitaryan, Zlatan og Eric Bailly en sagði að hann myndi vera rólegur þegar sá fjórði kæmi í hús.

Paul Pogba hóf ferilinn á Old Trafford en en fór tl Juventus á frjálsri sölu árið 2012 og hefur síðan þá orðið einn besti leikmaður heims.