Dramatískur sigur ÍBV þremur dögum fyrir bikarúrslit

ÍBV vann dramatískan 2-1 sigur á Fylki í 11. umferð Pepsi-deildar kvenna, en leikið var á Hásteinsvelli.

Sigríður Lára Garðarsdóttir kom ÍBV yfir af vítapunktinum á fjórðu mínútu og þannig stóðu leikar langt fram í síðari hálfleik.

Varamaðurinn Rut Kristjánsdóttir jafnaði metin á 78. mínútu, en fjörinu var ekki lokið því natsha Moraa Anasi tryggði ÍBV sigur í uppbótartíma.

Eyjastúlkur eru á leið í bikarúrslit á föstudaginn, en liðið spilar þá við Stjörnuna. Þetta er sannarlega gott veganesti í þann leik.

ÍBV er með 18 stig í fimmta sætinu, en Fylkir er í sjöunda með 10 stig. Þær eru enn í fallhættu, en þær eru einungis þremur stigum frá KR sem er í fallsæti.