Þormóður og Aníta komu við í Sao Paulo á leið til Ríó

Sjö af átta keppendum Íslands á Ólympíuleikunum í Ríó hafa nú skilað sér í Ólympíuþorpið í Ríó en júdókappinn Þormóður Árni Jónsson og Anítu Hinriksdóttir mættu bæði í dag eftir mjög langt ferðalag.

Þormóður Árni Jónsson og Aníta Hinriksdóttir lögðu bæði af stað frá Íslandi rúmum sólarhringi fyrr og þurftu að taka þrjú flug á leið sinni á Ólympíuleikana.

Blaðamaður og ljósmyndari 365 voru með þeim Þormóði Árna og Anítu í fyrsta fluginu til New York en þá skildu leiðir.

Fulltrúum 365 fannst nóg um að þurfa að bæta við tíu tíma flugi frá New York til Ríó við það sem var farið fyrr um morguninn frá Keflavík til Ríó.

Það var þó ekki mikið hægt að kvarta því Þormóður og Aníta, ásamt flokkstjóranum í júdó, Jóni Hlíðari Guðjónssyni, og þjálfaranum Bjarna Friðrikssyni, fóru öll enn lengra.

Þau flugu fyrst alla leið til Sao Paulo, suður af Ríó, og þurftu svo að taka annað flug til Ríó eftir nokkra tíma bið.

Þormóður Árni Jónsson og Aníta Hinriksdóttir taka bæði þátt í setningarathöfninni annað kvöld, sú fyrsta hjá Antíu en sú þriðja hjá Þormóði sem verður fánaberi.

Þau keppa þó ekki fyrr en eftir rúma viku sem betur fer því það tekur þau örugglega dágóðan tíma að koma sér í gang á ný eftir allt þetta ferðlag.

Nú vantar því bara kringlukastarann Guðna Val Guðnason sem kemur ekki fyrr en eftir helgi.