Sumar myndirnar eru teknar á súpudaginn

Það er fullt af fólki á myndunum en ekki er hægt að greina andlit þess,“ segir María K. Steinsson ljósmyndari innt eftir myndefni á sýningunni Samfelld augnablik sem verður uppi á lofti í Iðnó á Menningarnótt, milli klukkan 13 og 23.

„Þetta eru myndir úr seríu sem ég er búin að vinna að síðan 2014 - mannlífsmyndir en svolítið öðruvísi en algengastar eru af því ég tek þær á tíma. Þannig fæ ég hreyfingu í þær sem ég er að sækjast eftir. Ég hef áhuga á að nota myndavélina til að sýna meira en eitt augnablik, vil safna tímanum í myndina. Allt verður svolítið blörrað og fólkið eins og hálfgerðir draugar.“

María kveðst sæta lagi og fara út með myndavélina þegar einhverjir viðburðir eru eins og Menningarnótt, druslugangan eða Reykjavík Pride. „Þrjár myndanna á sýningunni eru teknar á súpudaginn þar er fólk í röðum að bíða eftir súpu.“

Hún lærði listmálun en segist líka alltaf hafa verið að taka myndir frá því hún man eftir sér þó það hafi ekki alltaf verið í listrænum tilgangi.

Hún er með BA-gráðu í fögrum listum frá City & Guilds of London Art School í London þar sem hún var í námi á árunum 2005-2008 og Mastersnámi í ljósmyndun lauk hún við listadeild Kingston University í Bretlandi. Kveðst hafa byrjað þar að einbeita sér að þessum blörraða stíl.

„Fyrst var ég mest sjálf fyrir framan myndavélina en nú er ég farin að fara út og beina linsunni að fólksfjölda,“ segir María en hægt er að kynna sér verk hennar nánar á heimasíðunni mariaksteinsson.com.