Hrafnhildur: Verst er að ég þarf að borða svo oft

Íslenska sundkonan Hrafnhildur Lúthersdóttir fær ekki mikinn tíma til að ná úr sér þremur sundum í 100 metra bringusundinu á Ólympíuleikunum í Ríó. Úrslitasundið var aðfaranótt þriðjudagsins og hún keppir strax aftur í dag.

Hrafnhildur varð í 100 metra bringusundinu fyrsta íslenska konan til að synda til úrslita á Ólympíuleikum. Hrafnhildur hækkaði sig í hverju sundi en þetta var í þriðja sinn sem hún synti sundið á leikunum. Hún var með níunda besta tímann í undanrásum en sjöunda besta tímann í undanúrslitunum og endaði síðan á því að tryggja sér sjötta sætið í úrslitunum.

Vorkenndi heimsmethafanum

„Ég komst upp um eitt sæti og það er alltaf gott. Að vera á undan Ólympíu­meistara og heimsmethafa það er líka alltaf frábært,“ segir Hrafnhildur Lúthersdóttir en hún var á undan Litháanum Ruta Meil­utyte í úrslitasundinu.

Ruta Meilutyte á heimsmetið og vann gull á Ólympíuleikunum í London fyrir fjórum árum. Hún varð í sjöunda sæti í sundinu og var hágrátandi á eftir.

„Ég vorkenndi henni svo sem af því að þetta gekk ekkert upp hjá henni og hún var alveg niðurbrotin eftir sundið. Það er samt frábært að geta unnið hana. Minnstu mistök og þá er bara allt búið. Ég gerði mín eigin mistök og þetta var alls ekki fullkomið sund því ég var alveg dauð í endann. Þetta var heldur ekki góður tími og ég hefði viljað fara á miklu betri tíma,“ segir Hrafnhildur.

„Ég get ekki kvartað því ef ég hefði verið í áttunda sæti þá hefði ég samt verið ánægð. Áttunda sætið á Ólympíuleikunum er alveg frábært. Ég er ánægð,“ segir Hrafnhildur.

Óvenjulegur keppnistími

Úrslitasundið fór ekki fram fyrr en mjög seint um kvöldið sem er mjög óvenjulegt fyrir sundfólkið. Verið er að stilla sundið inn á besta sjónvarpstíma í Bandaríkjunum þar sem áhuginn er mjög mikill.

„Við erum komin í rútínu. Ég reyndi samt að sofa svolítið út í morgun en svo verður maður bara að leggja sig á milli,“ segir Hrafnhildur um fyrirkomulagið á mánudaginn þegar hún synti úrslitasund rétt fyrir klukkan ellefu um kvöldið að staðartíma í Ríó.

„Það er líka það að þegar maður er vakandi svona lengi þá þarf maður að borða svo oft og eitthvað svona,“ segir Hrafnhildur og hlær.

„Við náum að jafna okkur á þessu og það þýðir ekkert annað ef við viljum synda vel,“ segir Hrafnhildur.

Lærði mikið af þessu sundi

Undanrásirnar í 200 metra bringusundinu eru strax í dag og hún syndir síðan í undanúrslitunum í nótt takist henni að tryggja sig þangað inn.

„Ég fæ bara einn dag til þess að hvíla mig en ég þarf að fara að stilla mig inn á hraðann í 200 metra sundinu og synda það,“ segir Hrafnhildur og hún er ekkert hætt þrátt fyrir frábæran árangur í fyrstu grein.

„Ég lærði mjög vel af þessu 100 metra sundi og hlakka til að fara í tvö hundruð,“ sagði Hrafnhildur.

„Þó að ég sé ekki með hraðann þá er ég með þessi löngu tök held ég enn þá. Ég held að ég eigi eftir að standa mig nokkuð vel í 200 eða ég vona það allavega. Maður veit aldrei hvað hinar sundkonurnar gera eða hvernig þær standa sig. Ég ætla að reyna mitt besta og reyna að komast eins langt og ég get,“ segir Hrafnhildur að lokum.