Sérstakt ánægjuefni að Ari Trausti sé inni

„Samkvæmt fyrstu tölum sjáum við að ríkisstjórnin virðist vera fallin en auðvitað vitum við ekki hvað komandi tölur bera með sér. Við þekkjum það að þetta á það til að sveiflast,“ segir Katrín Jakobsdóttir, formaður Vinstri grænna, um fyrstu tölur í samtali við Ríkisútvarpið.

Aðspurð um tölur úr Suðurkjördæmi, þar sem flokkurinn er með 9,9 prósent talinna atkvæða, segir Katrín sérstakt fagnaðarefni að Ari Trausti Guðmundsson, oddviti Vinstri grænna, sé inni. „Í Suðurkjördæmi höfum við ekki átt þingmann en við höfum fundið það úr suðurkjördæmi að málflutningur Ara hefur mælst vel fyrir og það er sérstakt fagnaðarefni ef við erum að ná honum inn á þing.“

Katrín segir stöðuna geta breyst eftir því sem líður á nóttina en hún sé nokkuð sátt með stöðuna eins og hún lítur út núna.

Katrín veitti Stöð 2 einnig viðtal örlitlu seinna sem sjá má í spilaranum hér að neðan.