„Skiptir ekki höfuðmáli hvort þeir þurfi að keyra í nokkrar mínútur í viðbót á Vífilstaði“

Lilja Alfreðsdóttir segir að þrátt fyrir að Framsóknarflokkurinn vilji reisan nýjan Landspítala, hvort sem það er við Vífilstaði eða annars staðar, breyti það ekki afstöðu flokksins til staðsetningu Reykjavíkurflugvallar. Ný staðsetning spítalans muni ekki hafa afgerandi áhrif á sjúkraflug að mati utanríkisráðherrans.

Lilja var spurð í Kosningaspjalli Vísis hvernig nýr spítali samræmdist áherslum Framsóknarflokksins í flugvallarmálum en hann hefur verið ötull talsmaður núverandi legu Reykjavíkurflugvallar á undanförnum árum. 

Til að mynda hefur hann boðið sig fram undir merkjum Flugvallarvina í síðastliðnum borgarstjórarkosningum og þá hefur þingmaður flokksins talað fyrir lagasetningu sem myndi festa núverandi staðsetningu flugvallarins í Vatnsmýri.

Einhver helstu rökin fyrir núverandi legu flugvallarins í Vatnsmýri hafa verið mikilvægi hans fyrir sjúkraflug í landinu vegna nálægðarinnar við Landspítalann við Hringbraut. Lilja telur að flutningur spítalans muni þó ekki hafa afgerandi áhrif á sjúkraflugið. Hún segir í því samhengi að mikilvægt sé að átta sig á því að byggingin sem fyrirhuguð sé við Hringbraut henti ekki núverandi þyrluflota.

Flugvöllurinn ekki á förum þó nýr spítali rísi

Þá sé líðan fólks sem alla jafna er flutt með sjúkraflugi orðin stöðug og því telji Framsóknarflokkurinn ekki skipta höfuðmáli hvort þeir þurfi „að keyra í nokkrar mínútur í viðbót á Vífilstaði eða á annan stað,“ eins og Lilja orðar það.

Það þýðir þó ekki að flugvöllurinn megi hverfa úr Vatnsmýri og spítalinn verði áfram á Hringbraut að mati Lilju.

„Flugvöllurinn fer ekki neitt nema að það sé búið að finna nýjan stað fyrir innanlandsflugið. Þetta þarf allt að fara saman,“ segir Lilja. Hún sé því ekki á sama á máli og margir sem vilja að spítalinn verði áfram á sama stað en að flugvöllurinn fari. Áður þurfi að liggja fyrir raunhæfar tillögur um framtíð innanlandsflugsins.

Viðtalið við Lilju má sjá í spilaranum hér að ofan. Þar eru hugmyndir Framsóknar um nýjan spítala ræddar frekar sem og áherslur flokksins í öðrum málaflokkum; svo sem skatta- og innflytjendamálum.