Lærisveinar Dags Sigurðssonar í þýska landsliðinu í handbolta þurftu heldur betur að hafa fyrir sigrinum í naumum 23-22 sigri á nágrönnunum í Sviss.
Flestir áttu eflaust von á auðveldum sigri ríkjandi Evrópumeistaranna gegn nágrönnum sínum sem hafa ekki komist á stórmót í tuttugu ár.
Þýskaland leiddi 12-11 í hálfleik en Sviss náði að halda í við Þjóðverja og náði forskotinu 22-21 stuttu fyrir leikslok.
Taugar þýska liðsins reyndust hinsvegar sterkari á lokamínútunum og fögnuðu Þjóðverjar að lokum naumum sigri.
Var þetta annar sigur Þjóðverja í röð sem eru með fullt hús stiga eftir tvær umferðir en Slóvenar geta komist upp að hlið Þýskalandi með sigri gegn Portúgal síðar í dag.
Lærisveinar Dags sluppu með skrekkinn gegn nágrönnunum
