Undrast langlundargeð forsetans í garð Bjarna

„Með svona gangi gætu menn allt eins kvatt jól og brennur án þess að búið sé að ganga frá sáttmála nýrrar stjórnar,“ segir Össur Skarphéðinsson, fyrrverandi þingmaður Samfylkingarinnar, sem fer yfir stöðu mála varðandi stjórnarmyndunarviðræður á Facebook-síðu sinni.

Össur segist hafa undrast yfir því langlundargeði sem honum finnst Guðni Th. Jóhannesson, forseti Íslands, sýna Bjarna Benediktssyni, formanni Sjálfstæðisflokksins, við stjórnarmyndun.

„Sem ljóst var fyrir löngu að átti enga möguleika á að verða barn í brók. Jafnvel ég sem er þó annálaður fyrir bjartsýni, hefði aldrei látið mér koma til hugar að basla við það í fyrsta umgangi Bessastaðarúnta að reyna að berja saman ríkisstjórn utan um kjarna fráfarandi stjórnar,“ skrifar Össur.

Hann segir Benedikt ekki svo vitlausan. „Þó glitt hafi í að öðrum „ábyrgum“ hafi langað að láta fallerast.“

Össur segir miðjubandalagið nýja hafa ekkert pólitískt svigrúm til að taka að sér að blása lífi í fallna ríkisstjórn Sjálfstæðisflokks og Framsóknar. „Nema það sé einlægur vilji til þess að henda tilvist sinni og framtíð eins og hverjum öðrum eldsmat á nýársbrennur landsmanna,“ segir Össur.

Hann telur þó að allar afstöður kunni að breytast. „Sér í lagi ef forsetinn ætlar að leyfa formönnum að henglast hartnær tvær vikur með blessað umboðið í hverjum rúnti,“ segir Össur.

Þetta gæti því orðið æði langdregin stjórnarmyndun að hans mati. „Jafnræðið krefst þess væntanlega að Katrín fái ekki skemmri tíma en Bjarni, og gangi það ekki, þá kemur röðin að Bensa. Með svona gangi gætu menn allt eins kvatt jól og brennur án þess að búið sé að ganga frá sáttmála nýrrar stjórnar.“

Hann segir „Bensana“, þá í meiningunni Viðreisnarmenn, hafa teflt afburða vel til þessa hina pólitísku refskák og telur Viðreisn eiga mikla möguleika á að ná helstu málum sínum á dágóðan rekspöl í allt öðruvísi stjórn en Bjarni Benediktsson reynir að koma saman þessa dagana.

„Það er ekkert að minnihlutastjórn og má færa rök að því að þær séu þinginu og lýðræðinu bráðhollar eins og staðan er núna. Það er heldur ekkert að margra flokka stjórnum. Eru menn ekki að mynda sex flokka stjórn í Eistlandi þessa dagana,“ spyr Össur að endingu.