Börsungar misstu af mikilvægum stigum gegn Betis

Barcelona missteig sig í baráttunni um spænska meistaratitilinn en liðið var heppið að sleppa með stig á útivelli gegn Real Betis í dag.

Nú er Real Madrid með eins stiga forskot á Barcelona ásamt því að eiga tvo leiki til góða en Madrídingar eiga leik gegn Real Sociadad seinna í dag.

Alex Alegria kom Betis yfir á heimavelli og virtist allt ætla að stefna í að það væru óvænt en þrjú kærkomin stig á leið til heimamanna þegar Luis Suarez jafnaði metin undir lok venjulegs leiktíma.

Fékk hann þá sendingu inn fyrir vörnina frá Lionel Messi og renndi boltanum í hornið framhjá markmanni Betis.

Suárez kom boltanum aftur í netið í uppbótartímanum en dómarinn dæmdi að hann hefði notað hendina til að stjórna boltanum og dæmdi markið af.

Var það ekki í eina skiptið sem dómarinn reyndist Börsungum erfiður en fyrr í leiknum missti hann af augljósri vítaspyrnu sem Barcelona átti að fá.

Í sömu sókn fór skot Jordi Alba langt yfir marklínuna en varnarmaður hreinsaði innan úr markinu en dómarinn gaf til kynna að boltinn hefði ekki farið allur yfir línuna. Dýr mistök þar á ferð.

Skiptu liðin því stigunum jafnt á milli sín en þetta er annað jafntefli Barcelona í síðustu fjórum leikjum.