Enrique: Denis Suárez getur orðið nýi Harry Potter hjá Barcelona

Luis Enrique, þjálfari Spánarmeistara Barcelona, segir Denis Suárez, miðjumann liðsins, vera nógu góðan til að taka við af sjálfum Andrés Iniesta til lengri tíma á miðjunni hjá Katalóníurisanum.

Suárez spilaði virkilega vel í 5-2 sigri Barcelona gegn Real Sociedad í spænska bikarnum í gær en hann skoraði tvö mörk er liðið komst í undanúrslitin. Enrique hrósaði honum í hástert eftir leikinn.

„Suárez getur orðið eftirmaður Iniesta. Af hverju ekki?“ sagði Luis Enrique á blaðamannafundi eftir leikinn um hinn 23 ára gamla Suárez sem gekk í raðir Barcelona frá Villareal síðasta sumar.

Andrés Iniesta er fyrir löngu búinn að tryggja sér stöðu sem einn af goðsögnum Barcelona en það fer að styttast í annan endann á veru hans á Nývangi. Iniesta er orðinn 32 ára gamall en er samt sem áður lykilmaður Katalóníuliðsins.

„Leikmenn verða að þróast. Suárez verður að bæta sig en Iniesta er Harry Potter Barcelona-liðsins. Hann galdrar alltaf eitthvað fram og það verður erfitt að finna mann í staðinn fyrir hann. Denis er samt á réttri leið og vonandi getur hann orðið erfingi Iniesta,“ sagði Luis Enrique.