NBA-meistararnir í Cleveland vildu ekki fá Carmelo Anthony

Carmelo Anthony, stórstjarna New York Knicks liðsins í NBA-deildinni í körfubolta, hefur átt betri daga en þessi öflugi leikmaður hefur aldrei komist langt í úrslitakeppninni á sínum ferli. Nú síðast sagði eitt besta lið deildarinnar „nei takk“ þegar því var boðið að fá til sín Melo.

Von um að spila með meistaraliði vaknaði í stuttan tíma þegar New York Knicks var tilbúið að skipta honum til NBA-meistara Cleveland Cavaliers. Vandmálið fyrir Carmelo Anthony var hinsvegar það að forráðamenn Cleveland höfðu engan áhuga.

Framtíð Carmelo Anthony í New York hefur verið mikið í umræðunni í bandarísku fjölmiðlum en lítið hefur gengið hjá honum í leiðtogahlutverki hjá liðinu.

New York Knicks bauð Cleveland Cavaliers Carmelo Anthony í skiptum fyrir Kevin Love en Cavs hafði engan áhuga á slíkum skiptum. ESPN segir meðal annars frá.

Carmelo Anthony er einn af þremur leikmönnum í NBA-deildinni í dag sem má ekki skipta nema með leyfi þeirra sjálfra. Hinir eru LeBron James hjá Cleveland Cavaliers og Dirk Nowitzki hjá Dallas Mavericks. New York hefði því þurft leyfi frá Melo til að skipta honum til Cleveland. 

LeBron James hefur gagnrýnt leikmannamál Cleveland-liðsins opinberlega og kallað eftir aðgerðum í yfirstjórn félagsins. Liðið missti bakvörðinn Matthew Dellavedova og miðherjann Timofey Mozgov úr meistaraliði sínu fyrir þetta tímabil og hefur gengið illa að fylla í vanmetin skörð þeirra. Það mun því örugglega eitthvað gerast áður en lokað verður fyrir félagskiptin í NBA-deildinni 23. Febrúar næstkomandi.

Carmelo Anthony er 32 ára gamall og fjórum árum eldri en Kevin Love. Hann á tvö ár eftir af samningi sínum við New York og fær næstum því 54 milljónir dollara fyrir þessi tvö ár eða rúma 6,2 milljarða íslenskra króna.

Hinn 28 ára gamli Kevin Love á eftir þrjú ár af samningi sínum og mun fá um 72 milljónir dollara fyrir þessi þrjú tímabil eða rúma 8,3 milljarða íslenskra króna.

Carmelo Anthony spilaði síðast í úrslitakeppninni árið 2013 en hann hefur spilað samtals 66 leiki í úrslitakeppni á fjórtán árum sínum í deildinni.  LeBron James kom inn í deildina á sama tíma og hefur spilaði samtals 199 leiki í úrslitakeppni.

Carmelo Anthony er með 22,6 stig, 6,0 fráköst og 3,1 stoðsendingu að meðaltali í leik á þessu tímabili en hann er með 43,5 prósent skotnýtingu og 37,1 prósent þriggja stiga skotnýtingu.

Kevin Love er með 20,5 stig, 10,9 fráköst og 1,8 stoðsendingu að meðaltali í leik á þessu tímabili en hann er með 42,9 prósent skotnýtingu og 37,4 prósent þriggja stiga skotnýtingu.