Sevilla lenti í vandræðum gegn botnliðinu

Sevilla lagði botnlið Osasuna í spænsku úrvalsdeildinni í fótbolta í dag 4-3 eftir að hafa lent undir í tvígang.

Osasuna sem var fyrir leikinn í neðsta sæti deildarinnar með 9 stig í 18 leikjum náði forystunni á 15. mínútu þegar Sergio León skoraði eftir sendingu Roberto Torres.

Iborra jafnaði metin tveimur mínútum fyrir hálfelik og var staðan í hálfleik 1-1.

Iborra varð fyrir því óláni að skora sjálfsmark á 63. mínútu en hann bætti fyrir það strax tveimur mínútum síðar þegar hann jafnaði metin í annað sinn í leiknum.

Franco Vazquez kom Sevilla yfir tíu mínútum fyrir leikslok áður en Pablo Sarabia gulltryggði liðinu mikilvægan sigur í baráttunni um spænska meistaratitilinn. Kenan minnkaði muninn fyrir Osasuna rétt áður en flautað var til leiksloka.

Sevilla er stigi á eftir toppliði Real Madrid sem á þó leik til góða og með fjórum stigum meira en Barcelona sem á leik í kvöld.

Osasuna situr eftir á botninum með 9 stig, 9 stigum frá öruggu sæti í deildinni.