Viðar Halldórsson: Bumbuboltinn á ekki að hafa áhrif á stefnu KSÍ

Viðar Halldórsson, formaður aðalstjórnar FH, segir að þau félög í neðri deildum á Íslandi sem eru ekki með barna- og unglingastarf eigi ekki að hafa atkvæðisrétt á ársþingi KSÍ.

Félögin í efstu deild hafa fjögur atkvæði en minnstu félögin í landinu hafa eitt atkvæði. Önnur hafa tvö til þrjú atkvæði.

FH og fleiri félög í efstu deild studdu Björn Einarsson í kjöri til formanns KSÍ en Guðni Bergsson naut mikils stuðnings meðal félaga í neðri deildunum. Hann vóg þungt en Guðni hrósaði sigri í formannskjörinu á ársþingi KSÍ á laugardaginn.

„Menn hafa rýnt í þetta og telja þetta vera örsökina fyrir því að Guðni fékk fleiri atkvæði. Þá er spurningin hvað er grasrót? Í mínum huga eru þessi neðstu deildar félög, eins og þau eru á Íslandi í dag, ekki grasrót,“ sagði Viðar í samtali við Hjört Hjartarson í útvarpsþættinum Akraborginni í dag.

„Til gamans sýnist mér 30 af þeim 40 félögum sem hafa skráð sig til leiks í tveimur neðstu deildunum séu án barna- og unglingastarfs og kvennastarfs. Þetta eru hópar manna sem hafa tekið sig saman og vilja spila fótbolta í meistaraflokki. Það kalla ég ekki grasrót,“ sagði Viðar og tók dæmi um að KR hefði fjögur atkvæði en KV tvö.

En þurfa félögin í neðri deildunum ekki að hafa sinn málsvara innan KSÍ?

„Auðvitað þurfum við að passa líka upp á það og alls ekki að örfá félög ráði öllu. Það er fullt af frábærum félögum í neðri deildunum sem eru bara með eitt atkvæði. Ég set stórt spurningamerki við það sem við köllum bumbubolta, að þau hafi áhrif á stefnu KSÍ. Mér finnst það óeðlilegt,“ sagði Viðar.

Hlusta má á viðtalið í heild sinni í spilaranum hér að ofan.