Deilur Jimmy Kimmel og Matt Damon verða harðari og harðari

Eitt af eftirminnilegri atvikunum frá Óskarskvöldinu í fyrra var þegar leikarinn Ben Affleck smyglaði vini sínum Matt Damon í spjallþátt Jimmy Kimmel.

Spjallþáttastjórnandinn brást hinn versti við enda hafa Damon og Kimmel eldað grátt silfur saman í rúman áratug. Allt er þetta gert í nafni grínsins og bráðfyndið á köflum.

Sjá einnig: Saga tíu ára illdeilna Jimmy Kimmel og Matt Damon

Í ár var Jimmy Kimmel kynnir á Óskarnum og mátti fastlega gera ráð fyrir því að deilurnar milli þeirra tveggja kæmu við sögu. Að þessu sinni settist Jimmy Kimmel niður og fór yfir leikaraferil Matt Damon á sinn skemmtilega hátt.

Sjá einnig: Jimmy Kimmel lét Trump heyra það í opnunarræðu Óskarsins

„Maður sér hvað hann hefur lagt mikið á sig. Hann hefur enga hæfileika og þetta er svo erfitt fyrir hann,“ sagði Kimmel.

Ben Affleck og Matt Damon gengu síðan út á sviðið og kynntu inn tilnefningar. Þá var Damon ávarpaður sem „gestur“.

Alltaf þegar Damon byrjaði að tala fór tónlist af stað svo það var í raun ómögulegt fyrir hann að koma sínum setningum til skila. Algjörlega óborganlegt eins og sjá má hér að neðan.