Björgólfur ekki í framboði til formanns SA

Björgólfur Jóhannsson, forstjóri Icelandair, hyggst ekki gefa kost á sér til áframhaldandi formennsku Samtaka atvinnulífsins, en hann hefur verið formaður samtakanna síðastliðin fjögur ár. Nýr formaður verður kjörinn í lok mánaðarins.

Björgólfur segist á vef samtakanna ekki hafa ætlað sér að gegna formennsku lengur en í þrjú ár. Nú séu þau orðin fjögur og því rétt að nýr aðili taki við keflinu. „Ég vil þakka öllum þeim sem ég hef starfað með á vettvangi SA, stjórnarfólki og starfsfólki samtakanna og aðildarfélögum fyrir stuðninginn. Einnig vil ég þakka forsvarsfólki samtaka launþega fyrir traust og gefandi samstarf á undanförnum árum,“ segir Björgólfur.

Eyjólfur Árni Rafnsson, sem setið hefur í stjórn SA frá 2014 og í framkvæmdastjórn síðastliðið ár, hefur lýst yfir framboði. Hann hefur jafnframt átt sæti í stjórn Samtaka iðnaðarins frá árinu 2014 og verið varaformaður SI.

Eyjólfur er húsasmiður að mennt og lauk síðar doktorsnámi í byggingaverkfræði. Hann var forstjóri Mannvits hf og forvera þess félags í tólf ár til ársloka 2015. Frá 2016 hefur Eyjólfur Árni sinnt ýmsum ráðgjafa- og stjórnunarstöðum, að því er segir á vef SA.

Ný formaður verður valinn í aðdraganda aðalfundar SA þann 29. mars næstkomandi með rafrænni kosningu meðal aðildarfyrirtækja samtakanna.