Dan Hardy: Mikið undir hjá Gunnari Nelson sem er engum líkur

Dan Hardy er ofurstjarna innan UFC en hann er fyrrverandi bardagamaður sem reyndar íhugar nú endurkomu. Hann er gríðarlega fróður um blandaðar bardagalistir og starfar sem aðallýsandi UFC í Evrópu.

Hardy var mættur á fjölmiðladag UFC í gær þar sem hann fylgdist með bardagaköppunum og ræddi við gesti og gangandi. Hann viðurkenndi í samtali við Vísi það sem marga hefur grunað: Hann er aðdáandi Gunnars Nelson.

Sjá einnig:„Hann mun reyna að djöflast á kallinum“

„Hann er gríðarlega áhugaverður bardagamaður því hann er engum líkur í íþróttinni. Hann er mjög rólegur bardagamaður, þolinmóður og velur höggin sín mjög vel. Hann er nákvæmastur allra í veltivigtinni þegar kemur að því að kýla menn. Hann er búinn að slá frá sér 170 sinnum og er númer eitt í deildinni,“ segir Dan Hardy við Vísi.

„Það er eitthvað sem ber að hafa í huga þegar hann berst nú við Alan Jouban sem er góður Muay Thai-bardagamaður. Svo er áhugavert að fylgjast með hversu miklu betri Gunni er alltaf að verða í gólfinu. Ég var alltaf slakastur þar þannig að sjá mann sem er jafngóður og Gunnar að glíma er dásemd fyrir mig.“

Gunnar er svo áhugaverður

Hardy heldur áfram að benda á hversu góður Gunnar er standandi þó hann fái alltaf mesta lofið fyrir það sem hann gerir í gólfglímunni. Hann vitnar til bardagans á móti Brandon Thatch í Las Vegas fyrir tveimur árum.

„Höggið sem felldi Brandon Thatch er eitt af því sem stendur upp úr á hans ferli að mínu mati. Bæði höggin voru fullkomin og þau leiddu að því að Gunni kom honum í gólfið og hengdi hann sem Gunni elskar,“ segir hann.

„Gunnar er svo áhugaverður bardagamaður því hann hreyfir sig ekki eins og nokkur annar maður og stendur ekki eins og neinn annar. Lyoto Machida er kannski líkastur honum en ég myndi segja að Gunnar er mun ákafari og hreyfanlegri á fótunum. Þegar hann slær þá slær hann til að meiða á meðan Machida reynir bara við eitthvað stórkostlegt. Gunnar er bardagamaður sem bardagamenn elska. Hann fer í hringinn til að klára verkefnið og það elska ég.“

Hardy má ekki spá hvernig fer því hann er að lýsa bardaganum en hvernig býst hann við að þetta gangi fyrir sig í búrinu á laugardaginn?

„Þetta verður erfitt fyrir báða aðila því bæði Gunni og Jouban þurfa að hafa bardagann eins og þeir vilja. Alan Jouban er með góða felluvörn og er góður í gólfinu en Gunni er óútreiknanlegur. Hann getur skipt um stöðu standandi hvenær sem er,“ segir Hardy.

„Hann hefur aðeins einu sinni tapað í gólfinu og það var á móti Demian Maia og allir tapa fyrir honum. Við gætum núna séð bestu útgáfuna af Gunnari Nelson. Alan Jouban er rísandi stjarna þannig það er mikið undir fyrir Gunnar. Þetta er sá bardagi sem ég er spenntastur fyrir og sá sem ég held að verði bardagi kvöldsins,“ segir Dan Hardy.

Allt viðtalið má sjá í spilaranum hér að ofan.

Ekki missa af neinu tengdu bardaga Gunnars Nelson og Alan Jouban. Vísir er í London og færir ykkur allar nýjustu fréttirnar af Gunnari og bardagakvöldinu í O2-höllinni á laugardaginn. Fylgdu okkur á Facebook, Twitter og Snapchat (sport365).