Birta nafn árásarmannsins

Maðurinn sem talinn er hafa framið árásina við breska þinghúsið í London í gær hét Khalid Masood. Hann var 52 ára Breti og hafði á árum áður verið undir eftirliti bresku leyniþjónustunnar. BBC greinir frá.

Hann var búsettur í Birmingham og hafði verið sakfelldur fyrir ýmsa glæpi í gegnum tíðina, þar á meðal líkamsáras. Hann var síðast sakfelldur árið 2003 þegar hann var dæmdur fyrir að hafa ólöglegt eggvopn í sinni vörslu.

Masood dók bílaleigubíl eftir Westminsterbrúnni og særði 40 manns. Þrír eru látnir, en sjö eru enn í alvarlegu ástandi. Þá ók hann bílnum á girðingu við þinghús Bretlands og fór inn á lóð hússins þar sem hann stakk óvopnaðan lögregluþjón til bana. Lögregluþjónninn hét Keith Palmer og var 48 ára gamall.

Íslamska ríkið hefur lýst yfir ábyrgð á árásinni í London í gær. Lögreglan telur að árásarmaðurinn hafi verið undir áhrifum hryðjuverkasamtaka en að hann hafi ekki verið meðlimur þeirra og að hann hafi staðið einn að árásinni.