Man. Utd í engum vandræðum með Sunderland

Manchester United vann góðan sigur á Sunderland, 3-0, í ensku úrvalsdeildinni í knattspyrnu í dag en leikurinn fór fram á heimavelli Sunderland. 

United hefur ekki tapað útileik síðan 23. október á síðasta ári þegar liðið steinlá fyrir Chelsea 4-0. 

Zlatan Ibrahimović skoraði fyrsta mark leiksins eftir um hálftíma leik. Hann fékk boltann fyrir utan vítateig, snéri sér við og þrumaði boltanum í fjærhornið.

Staðan var 1-0 fyrir United í hálfleik. Henrik Mkhitaryan kom Man. Utd. í 2-0 eftir aðeins 45 sekúndur í síðari hálfleiknum. 

Rashford skoraði síðan þriðja mark leiksins undir blálok leiksins.

Hér að neðan má sjá beina lýsingu frá leiknum.

14:19 - Marcus Rashford með mjög fínt mark. Hann fékk boltann hægra megin inni í vítateig Sunderland og þrumaði boltanum í fjærhornið.

14:15 - Leikurinn hefur verið gríðarlega rólegur undanfarnar mínútur og liðin bæði búin að sætta sig við úrslitin. 

13:35 - Henrik Mkhitaryan skorar annað mark United þegar aðeins 45 sekúndur eru liðnar af síðari hálfleiknum. Frábær byrjun hjá gestunum.

13:15 - Staðan 1-0 fyrir gestina í hálfleik.

13:13 - Sebastian Larsson fær hér beint rautt spjald eftir að hafa tæklað Ander Herrara. Mjög harður dómur. Sunderland einum leikmanni færri.

12:56 - Zlatan að koma Manchester United í 1-0. Svíinn fékk boltann fyrir utan vítateig, snéri sér við á punktinum og hamraði boltann í netið í fjærhornið.

12:42 - Leikurinn fer heldur rólega af stað en United er meira með boltann.