Neymar missir af El Clásico

Neymar missir af El Clásico, leik Real Madrid og Barcelona laugardaginn 23. apríl næstkomandi.

Neymar var úrskurðaður í þriggja leikja bann vegna rauða spjaldsins sem hann fékk í 2-0 tapi Barcelona fyrir Málaga á laugardaginn.

Þetta bann kemur á versta tíma fyrir Barcelona sem á í harðri baráttu við Real Madrid um spænska meistaratitilinn. Real Madrid er með þriggja stiga forystu á Barcelona og á auk þess leik til góða á Börsunga.

Neymar missir af heimaleik gegn Real Sociedad (15. apríl), útileiknum gegn Real Madrid (23. apríl) og heimaleik gegn Osasuna (26. apríl). Brasilíumaðurinn hefur skorað 15 mörk í öllum keppnum fyrir Barcelona í vetur.

Neymar verður væntanlega í eldlínunni þegar Barcelona sækir Juventus heim í fyrri leik liðanna í 8-liða úrslitum Meistaradeildar Evrópu í kvöld.