Börsungar slátruðu botnliðinu

Barcelona náði þriggja stiga forskoti á toppi spænsku úrvalsdeildarinnar með risasigri á Osasuna, 7-1, í kvöld.

Barcelona vann dramatískan sigur á Real Madrid á sunnudaginn og fylgdi honum eftir með því að slátra botnliði Osasuna sem er svo gott sem fallið.

Lionel Messi kom Börsungum á bragðið með frábæru marki á 12. mínútu og eftir hálftíma skoraði Andre Gomes annað mark heimamanna.

Staðan var 2-0 í hálfleik en Roberto Torres minnkaði muninn með glæsilegu marki beint úr aukaspyrnu á 48. mínútu.

Gomes kom Barcelona í 3-1 á 56. mínútu og fimm mínútum síðar skoraði Messi sitt annað mark og fjórða mark Barcelona. Hann fór svo af velli skömmu síðar.

Paco Alcácer skoraði fimmta markið á 64. mínútu og þremur mínútum síðar skoraði Javier Mascherano úr vítaspyrnu. Þetta var fyrsta mark Argentínumannsins fyrir Barcelona

Paco átti svo lokaorðið þegar hann skoraði sitt annað mark á 86. mínútu. Lokatölur 7-1, Barcelona í vil.

Real Madrid getur jafnað Barcelona að stigum með sigri á Deportivo La Coruna síðar í kvöld.