Börsungar vongóðir að leikbanni Neymar verði frestað | Ferðaðist með til Madríd

Börsungar vonast til þess að geta teflt fram brasilíska framherjanum Neymar þrátt fyrir að hann taki þessa dagana út þriggja leikja bann í stórleiknum gegn Real Madrid annað kvöld en hann ferðaðist með liðinu til höfuðborgar Spánar í gær.

Neymar fékk rautt spjald í 0-2 tapi Barcelona gegn Malaga á dögunum en aganefnd spænsku deildarinnar dæmdi hann í þriggja leikja bann og sakaði hann um að hafa gert lítið úr fjórða dómaranum á leiðinni af velli. Hefur hann þegar tekið út eins leikja bann.

Forráðamenn Barcelona kærðu úrskurðinn til gerðardómstóls íþrótta á Spáni en skiluðu inn kærunni seint að kvöldi til í gær þegar dómstóllinn hafði lokið störfum þá vikuna.

Hefur það borist út að forráðamenn Barcelona séu vongóðir um að á meðan málið sé í meðferð þá taki bannið ekki gildi og telji því að Neymar eigi því að geta tekið þátt í leiknum. Verður því fróðlegt að sjá hvort Börsungar láti á það reyna eða hvort hann verði í áhorfendastúkunni á morgun.

Þátttaka hans í leiknum yrði gríðarlegur liðsstyrkur fyrir Börsunga sem þurfa einfaldlega að vinna leikinn til að eiga einhverja von um að endurheimta spænska meistaratitilinn.