Könnun: Stefnir í stórsigur Íhaldsflokksins

Breski Íhaldsflokkurinn mælist með tíu prósentustiga forskot á Verkamannaflokkinn í skoðanakönnun sem gerð var fyrir dagblaðið The Independent. Fari kosningarnar á þann veg væri það stærsti sigur flokksins frá því í tíð Margaretar Thatcher.

Samkvæmt könnuninni fengi Íhaldsflokkurinn 44% atkvæða gegn 34% Verkamannaflokksins. Flokkurinn hefði samkvæmt þessu 74 sæta þingmeirihluta og bætti við sig 31 þingmanni. Verkamannaflokkurinn tapaði tuttugu þingmönnum.

Frjálslyndir demókratar mælast með 9% fylgi, Breski sjálfstæðisflokkurinn (UKIP) 5% og Græningjar 2%. Kosið verður til þings á Bretlandi á morgun.

Blaðið segir að könnunin leiði í ljós að margir kjósendur efist um að Jeremy Corbyn, leiðtogi Verkamannaflokksins, geti fjármagnað útgjaldaaukningu sem hann hefur boðað. Þá vantreysti þeir honum þegar kemur að útgöngu Breta úr Evrópusambandinu og þjóðaröryggismálum.