Sögulegur meistaratitill hjá Warriors

Golden State Warriors varð NBA-meistari í nótt eftir 129-120 sigur á Cleveland Cavaliers í nótt. Warriors vann þar með rimmu liðanna 4-1 og tapaði aðeins einum leik í úrslitakeppninni.

Þetta er annar titill Warriors á síðustu þremur árum og ekkert sem bendir til annars en að liðið verði á toppnum á komandi árum. Sæt hefnd einnig fyrir Warriors sem missti niður 3-1 forskot gegn Cleveland fyrir ári síðan. Þetta er í fyrsta sinn í sögu deildarinnar sem lið fer í gegnum úrslitakeppnina og tapar aðeins einum leik.

Kevin Durant átti enn einn stórleikinn fyrir Warriors en hann skoraði 39 stig í nótt.  Hann var með rúmlega 35 stig að meðaltali í leik í úrslitaseríunni og var kosinn besti leikmaður úrslitanna.

Hann skoraði 176 stig í leikjunum fimm sem er það næsthæsta í fimm leikja seríu frá upphafi. Aðeins Allen Iverson hefur gert betur en hann skoraði 178 stig árið 2001.

Þetta er í fyrsta sinn sem Durant verður NBA-meistari. Það varð allt brjálað er hann yfirgaf Oklahoma fyrir ári síðan til þess að eiga meiri möguleika á því að verða meistari. Það hafðist á fyrsta ári.

Durant var fljótur að taka að sér leiðtogahlutverkið hjá Warriors og með hann í ótrúlegu formi áttu LeBron James og félagar í Cleveland aldrei möguleika.

Stephen Curry var einnig mjög öflugur í nótt með 34 stig en hann var mjög slakur í fjórða leiknum. Andre Igoudala skoraði 20 stig.

LeBron gerði hvað hann gat til þess að stöðva Warriors með 41 stigi í nótt en hann var með þrefalda tvennu að meðaltali í úrslitaeinvíginu. Kyrie Irving skoraði 26 stig og JR Smith 25.