Curry gerir sögulegan samning við Golden State

Stephen Curry hefur skrifað undir sannkallaðan ofursamning við Golden State Warriors.

Nýi samningurinn hans Currys er til fimm ára og færir honum 200 milljónir Bandaríkjadala í laun.

Þetta er stærsti samningur í sögu NBA-deildarinnar. Curry er sá fyrsti til að skrifa undir samning sem rýfur 200 milljóna múrinn. Með tíð og tíma verður það þó venjan í samningum stórstjarna í NBA.

Curry var valinn númer sjö af Golden State í nýliðavalinu 2009 og hefur spilað með liðinu allar götur síðan.

Curry varð NBA-meistari með Golden State 2015 og 2017 og var valinn verðmætasti leikmaður deildarinnar 2015 og 2016.

Curry, sem er ein besta, ef ekki besta skytta í sögu NBA, var með 25,3 stig, 4,5 fráköst og 6,6 stoðsendingar að meðaltali í leik á síðasta tímabili.