Skipverjar skútunnar komnir um borð í rannsóknarskipið

Skipverjar á bandarísku skútunni, sem flugvél Isavia fann á ellefta tímanum í dag, eru komnir um borð í rannsóknarskipið Árna Friðriksson sem nú er komið á vettvang. Mastur skútunnar, sem lét úr höfn frá Virginíu-ríki í Bandaríkjunum í byrjun þessa mánaðar, hafði brotnað og rafmagnslaust var um borð. Þetta kemur fram í nýrri tilkynningu frá Landhelgisgæslunni.

Kveikt var á sendinum, sem sendi neyðarboðin, handvirkt og því reyndist full ástæða til að ætla að þarna væri alvara á ferð. Rannsóknaskipið Árni Friðriksson var í þrjátíu sjómílna fjarlægð frá staðsetningu sendisins og óskaði því stjórnstöð eftir því að hann færi þegar í stað á vettvang. Einnig var varðskipinu Þór, sem er við eftirlit suður af landinu, stefnt þangað. Sökum þess að flugvél Landhelgisgæslunnar, TF-SIF, er við landamæraeftirlit í Miðjarðarhafi á vegum Frontex var flugvél Isavia kölluð út, svo og Challenger-eftirlitsvél danska flughersins í Kangerlussuaq á Grænlandi.

Leitaraðgerðirnar voru blásnar af þegar í ljós kom að ekki var alvarleg hætta á ferðum. Mastur skútunnar hafði brotnað af og rafmagnslaust var um borð. Varðskipið Þór hélt þó áfram för sinni á vettvang.

„Samkvæmt upplýsingum frá Árna Friðrikssyni eru skipverjar á skútunni komnir um borð í rannsóknarskipið. Þeir yfirgáfu skútuna í gúmmíbjörgunarbát. Óljóst er hvert framhaldið verður með skútuna, það fer eftir ástandi hennar,“ segir í tilkynningunni.

Skútan lét úr höfn frá Virginíu-ríki í Bandaríkjunum í byrjun þessa mánaðar, samkvæmt upplýsingum frá bandarísku strandgæslunni. För skútunnar var heitið til Íslands en þrír voru um borð.