Kyrie Irving vill losna frá Cleveland Cavaliers

Kyrie Irving hefur mögulega spilað sinn síðasta leik með Cleveland Cavaliers en ESPN segir frá því að bakvörðurinn snjalli hafi beðið um að vera skipt til annars félags í NBA-deildinni í körfubolta.

Kyrie Irving lagði fram beiðnina á borð eigandans Dan Gilbert í síðustu viku en Irving vill spila þar sem hann fær meira aðalhlutverk í stað þess að vera í skugga LeBron James hjá Cleveland Cavaliers.

ESPN-blaðamaðurinn Brian Windhorst, sem þekkir vel  til hjá Cavaliers, skrifar fréttina á ESPN en hann segir að LeBron James hafi verið hissa og mjög vonsvikinn þegar hann frétti af beiðni Kyrie Irving.

Fyrir aðeins nokkrum dögum tjáði Kyrie Irving sig um frammistöðu Cleveland Cavaliers á markaðnum í sumar og var lýsti henni sem undarlegri. Fyrir ári síðan var Cleveland-liðið ríkjandi meistari en eftir tapið í lokaúrslitum í sumar hefur lítið verið að frétta hjá félaginu.

Kyrie Irving hefur verið leikmaður Cleveland Cavaliers frá því að félagið tók hann með fyrsta valrétti í nýliðavalinu 2011. Cleveland hefur komist í lokaúrslitin undanfarin þrjú tímabil. Hann á þrjú ár eftir af samningi sínum en getur sagt sig frá honum fyrir lokatímabilið sem er 2019-20 tímabilið.

LeBron James er samningslaus næsta sumar og einhverjar sögusagnir hafa verið um það að hann ætli þá að finna sér nýtt félag.  Þessi sprengja gerir ekkert annað en að flækja framtíðarsýn Cleveland Cavaliers.

Irving var með flottar tölur á sjötta tímabili sínu í deildinni en hann var með 25,2 stig og 5,8 stoðsendingar að meðaltali í leik. Hann hitti úr 40 prósent þriggja stiga skota sinna. Meðaltöl hans á ferlinum eru 21,6 stig og 5,6 stoðsendingar.

Það verður ekki auðvelt fyrir Cleveland að leysa þetta mál sem er komið upp með Kyrie Irving. Hvað þeir gætu fengið í staðinn fyrir hann er líka önnur saga og jafnvel enn flóknari.