Navas aftur til uppeldisfélagsins

Spænski kantmaðurinn Jesús Navas hefur samið við uppeldisfélagið Sevilla.

Samningur Navas við Manchester City var ekki endurnýjaður og hann yfirgaf enska félagið því í sumar. Navas lék með City í fjögur ár og varð Englandsmeistari með liðinu 2014.

Navas skrifaði undir fjögurra ára samning við Sevilla sem hafnaði í 4. sæti spænsku úrvalsdeildarinnar á síðasta tímabili.

Navas þarf aðeins 27 leiki í viðbót til að verða leikjahæstur í sögu Sevilla. Juan Arza Inigo á leikjametið (419 leikir) hjá Andalúsíufélaginu.

Navas hefur leikið 35 landsleiki fyrir Spán. Hann var í spænska hópnum sem var heimsmeistari 2010 og Evrópumeistari tveimur árum síðar.