Missti stórutána í vinnunni og kennir Katy Perry um

Christina Fish er fyrrum starfsmaður tónlistarkonunnar Katy Perry og vill konan meina að hún hafi misst stórutána er hún vann við tónleikaferðalag Perry árið 2014.

Um er að ræða heimstúr Perry sem bar nafnið Prismatic World Tour. Fish slasaðist á tá þegar hún vann við tónleika Perry í New York árið 2014 og urðu afleiðingarnar þær að hún fékk drep í stórutána.

TMZ greinir frá þessu en konan vill meina að það hafi reynst henni dýrkeypt að ekki hafi verið hringt á sjúkrabíl, heldur fékk hún klakapoka til að kæla. 

Vikurnar liðu og fljótlega kom í ljós að það hafði komið drep í tána. Að lokum þurfti að fjarlægja hana og nú hefur hún kært Perry og fer fram á skaðabætur. Inni á vefsíðu TMZ má sjá skuggalegar myndir af ferlinu og hvernig táin versnaði og versnaði.