Húsleitir vegna meints samsæris um pólitísk morð í Þýskalandi

Lögreglan í norðurhluta Þýskalands hefur gert húsleitir á heimilum og vinnustöðum tveggja hægriöfgamanna sem eru grunaðir um að leggja á ráðin um að ráða stjórnmálaleiðtoga af dögum.

Ríkissaksóknari Þýskalands sagði í yfirlýsingu að mennirnir séu grunaðir um að hafa birgt sig upp af skotfærum og búið til lista yfir skotmörk. Ástæðan sé reiði þeirra yfir innflytjenda- og flóttamannastefnu þýskra stjórnvalda.

Mennirnir tveir eru þó ekki í varðhaldi, að því er segir í frétt CNN-fréttastöðvarinnar. Húsleitirnar fóru fram í sambandsríkinu Mecklenburg-Vorpommern.

Þeir eru sagðir hafa áformað að drepa stjórnmálaleiðtoga af vinstri væng þýskra stjórnmála.