Strákarnir óskuðu sérstaklega eftir keilunni fyrir hópmyndina

Keila stal senunni þegar að karlalandsliðið í knattspyrnu flaug utan til þátttöku á Evrópumótinu í Frakklandi á síðasta ári. 

Strákarnir létu mynda sig í jakkafötunum við flugvél Icelandair og í morgun flugu strákarnir okkar í körfuboltalandsliðinu út til að taka þátt á Eurobasket í næsta mánuði. 

Finnur Freyr Stefánsson, aðstoðar landsliðsþjálfari, tók eftir því að það vantaði keiluna á Keflavíkurflugvelli í morgun og fékk hann flugvallarstarfsmann til að sækja keiluna frægu fyrir hópmyndina. 

Keilan fær því að vera með á hópmyndinni á ný og spurning hvort um sé að ræða happagrip en íslenska landsliðið í knattspyrnu fór hreinlega á kostum á EM í Frakklandi fyrir rúmlega ári síðan.