Byggja heita laug á þremur hæðum við Langasand

Akraneskaupstaður og Ístak hafa undirritað samninga þess efnis að Ístak sjái um byggingu á heitri laug við Langasand sem mun bera nafnið Guðlaug. Mun verkið hefjast á næstu dögum og á því að vera að fullu lokið þann 30. júní á næsta ári.

Í tilkynningu frá Ístaki segir að verkið felist í uppsteyptu laugarmannvirki sem staðsett verður í brimvarnargarðinum á Langasandi. Guðlaug mun þjóna fjórþættu hlutverki sem birtist í hæðunum þremur og tröppum þess.

„Þriðja hæðin næst áhorfendastúku er útsýnispallur, þar undir á annarri hæð er heit setlaug og sturtur.  Á annarri hæð er einnig tækjarými.  Á fyrstu hæð er grunn vaðlaug.  Á milli hæðanna eru tröppur sem einnig mynda tengingu á mill bakkans og fjörunnar,“ segir í tilkynningunni.