Dalí ekki faðir konu sem krafðist DNA-rannsóknar

Samanburður á erfðaefni hefur leitt í ljós að listamaðurinn Salvador Dalí er ekki faðir spænskrar konu sem hélt því fram að hún væri afkvæmi ástarsambands súrrealistans og móður hennar.

Lík Dalí var grafið upp í júlí eftir að dómari féllst á kröfu Maríu Pilar Abel Martínez um faðernispróf. Hún hefur haldið því fram að móðir hennar hafi átt vingott við Dalí árið 1956, árið sem hún fæddist.

Niðurstöður samanburðar á erfðaefni þeirra sýna hins vegar að þau eru ekki skyld, að því er segir í frétt breska ríkisútvarpsins BBC.

Martínez hefði getað gert kröfu til hluta dánarbús Dalí reyndist hún vera laundóttir listamannsins. Dalí eftirlét spænska ríkinu eignir sínar þegar hann lést árið 1989.