Sagði nei við Morgunútvarpið en já við United Silicon

Fyrrum fjölmiðlakonan, almannatengilinn og samskiptastjórinn Karen Kjartansdóttir mun sinna hlutverki talsmanns United Silicon næstu mánuði.

Greint var frá ráðningu Karenar, ásamt annnara nýrra starsfmanna United Silicon, í yfirlýsingu fyrirtækisins í gær vegna heimildar til greiðslustöðvunar þess til 4. desember. Athygli vekur að áður hafði hún tekið að sér starf í Morgunútvarpi Rásar 2 en óskað síðar eftir því að sú ráðning gengi til baka.

Karen hefur komið víða við á liðnu ári. Þannig var greint frá því í janúarlok að hún hefði látið af störfum sem samskiptastjóri Samtaka fyrirtækja í sjávarútvegi en hún hafði gegnt starfinu frá árinu 2013.

Þá var hún ráðin til starfa hjá almannatengslaskrifstofunni Aton í apríl síðastliðnum en fyrirtækið veitir meðal annars ráðgjöf við almannatengsl og markaðssetningu.

Það var svo í ágúst sem greint var frá því að Karen hefði verið ráðin sem dagskrárgerðarmaður í Morgunútvarp Rásar 2. Hún baðst þó undan því starfi og í ráðningartilkynningu eftirmanns hennar, Sigríðar Daggar Auðunsdóttir, segir að Karen hafi „af persónulegum ástæðum“ óskað eftir því að ráðning hennar gengi til baka.

Við því var orðið og er Karen nú komin til United Silicon, að ósk stjórnar fyrirtækisins, sem fyrr segir.