Um fjórðungur skólps óhreinsaður

Árið 2014 bjó um fjórðungur landsmanna ekki við neina skólphreinsun þrátt fyrir að öll þéttbýlissvæði hafi átt að vera komin með fullnægjandi skólphreinsun í lok árs 2005. Auk þess eru vísbendingar um að skólphreinsunin sem komin er uppfylli í sumum tilvikum ekki þær kröfur sem gerðar eru til hennar. Þetta kemur fram í nýrri stöðuskýrslu Umhverfsistofnunar um frárennslismál.

Þar segir að hægt hafi á framkævmdum seinni ár og frá því að síðasta stöðuskýrsla var gefin út árið 2010 og hefur þeim sem búa við einhverskonar skólphreinsun einungis fjölgað um tvö prósent. Óvíst er hvort að um sé að ræða raunverulega fjölgun vegna óvissu í gögnum. Af því skólpi sem myndaðist í þéttbýli á landinu var 94 prósent losað í sjó, fimm prósent í ár og stöðuvötn og eitt prósent í ármynni eða grunnvatn.

Árið 2014 var 68 prósent skólps frá þéttbýlum hreinsað með eins þreps hreinsun, tvö prósent með tveggja þrepa og eitt prósent með frekari hreinsun en tveggja þrepa. Aftur á móti var 24 prósent skólpsins ekkert hreinsað og ekki er vitað hvernig fimm prósent þess var hreinsað eða hvort það hefði yfirleitt fengið nokkra hreinsun.

Í skýrslunni segir að það fyrirkomulag sem stuðst sé við í dag hafi ekki skilað tilætluðum árangri. Skýra þurfi ábyrgðarskiptingu milli sveitarfélaga sem rekstraraðila fráveitna, fyrirtækja, heimila í dreifbýli og eftirlitsaðila það er heilbrigðisnefnda sveitarfélaga og Umhverfisstofnunar, með það að markmiði að byggja upp nægilega gott kerfi til að tryggja nauðsynlegan árangur í málaflokknum. Meðal annars þurfi að skýra hvort og þá hvernig þvingunarúrræðum verði beitt gagnvart þeim sveitarfélögum sem ekki uppfylla sínar lagalegu skyldur.