Eyvindur Sólnes í eigendahóp LEX

Hæstaréttarlögmaðurinn Eyvindur Sólnes, sem hefur starfað hjá CATO Lögmönnum frá árinu 2011, hefur gengið til liðs við LEX þar sem hann verður á meðal eigenda að lögmannsstofunni. Eyvindur mun formlega hefja störf á LEX, næststærstu lögmannsstofu landsins, síðar á árinu.

Á meðal helstu sérsviða Eyvindar eru samningaréttur, félagaréttur, samkeppnisréttur, málflutningur og fjárhagsleg endurskipulagning. Eyvindur hlaut réttindi til málflutnings fyrir Hæstarétti 2010 en sama ár lauk hann MBA-námi við Háskólann í Reykjavík.

Talsvert hefur verið um breytingar í eigendahópi LEX síðustu misseri. Karl Axelsson hæstaréttarlögmaður hætti hjá stofunni í árslok 2015 þegar hann var skipaður dómari við Hæstarétt og ári síðar hætti einnig Garðar G. Gíslason, einn af aðaleigendum LEX í yfir áratug, og stofnaði lögmannsstofuna IUS.

Þá hefur Aðalsteinn E. Jónasson hætt hjá LEX eftir að hann var skipaður dómari við Landsrétt. Óskar Sigurðsson hæstaréttarlögmaður kom hins vegar í eigendahópinn í ársbyrjun 2017 við samruna JP Lögmanna og LEX.

Fréttin birtist fyrst í Markaðnum, fylgiriti Fréttablaðsins um viðskipti og efnahagsmál.