Einhleyp og eignaðist þríbura með tæknifrjóvgun: Valborg væri alveg til í fleiri börn

„Árið 2012 ákvað ég að mig langaði að eignast barn ein,“ segir Valborg Rut Geirsdóttir, 29 ára Akureyringur, sem á í dag þríbura sem hún eignaðist með gjafasæði. Valborg eignaðist tvær stelpur og einn strák og eru þau í dag sjö mánaða gömul. Þau heita Bergdís Kara, Bríet Karítas og Brynjar Kári. Hún var í viðtali í Íslandi í dag í gærkvöldi.

„Þá fannst mér þetta frekar klikkuð hugmynd og ég ákvað að bíða í nokkra mánuði og ganga með hugmyndinni og ákvað að bíða og sjá hvort ég myndi hætta við. Það gerðist ekki.“

Valborg fór í nokkrar tæknifrjóvganir árið 2013 þar til þungun tókst sem var í júní árið 2014. Eftir tæplega þrjátíu vikna meðgöngu fæddist Pétur Emanúel andvana.

„Þá hrundi allt hjá mér,“ segir Valborg sem ákvað þá að gefast ekki upp. Fjórum mánuðum síðar var hún komin á fullt í tæknifrjóvgunarferlið. Hún hefur farið í fjórar ferðir til Danmerkur og eytt mörg hundruð þúsund krónum í tæknifrjóvganir. Svo kom að þeim gleðifréttum að hún væri ólétt. Í fyrstu þremur heimsóknum til ljósmóðir var henni sagt að hún gengi með eitt barn.

„Gildin úr blóðprufunum voru alltaf rosalega há og mér fannst þetta alltaf of hátt fyrir eitt barn. Ég var eiginlega alltaf viss um að ég væri með tvíbura þar sem það voru settir upp tveir fósturvísar í þessari tilraun,“ segir þessi kraftmikla kona. Hún var því undirbúin tvíbura en ekki þrjú börn.

„Þegar ég labbaði út úr sjúkrahúsinu þá sprakk ég úr hlátri og hló held ég marga daga. Ég gat heldur ekki þagað yfir þessu lengur, þrátt fyrir að vera bara komin tíu vikur á leið, því það sást strax vel á mér.“

Meðgangan gekk vel en vegna sögunnar var Valborg eðlilega hrædd um að eitthvað myndi fara úrskeiðis. Börnin voru tekin með keisaraskurði og segir Valborg að hún hafi ekki byrjað að anda eðlilega fyrr enn öll börnin voru byrjuð að gráta.

„Fyrst var ég bara ein með þau á kvöldin en svo fóru þau að færa sig upp á skaftið og núna er yfirleitt alltaf einhver með mér hér á kvöldin.“

Fréttablaðið ræddi ítarlega við Valborgu í byrjun september og má lesa þá grein hér.

Hvernig er dagurinn hjá Valborgu?

„Það er enginn dagur eins. Við vöknum yfirleitt mjög snemma, svona í kringum sex leytið og sem betur fer er ég algjör A-manneskja. Þetta er samt kannski fullsnemmt alla daga. Við liggjum síðan saman upp í rúmi í smá tíma og förum síðan fram í morgunmat. Um tveimur tímum síðan leggja þau sig og þá fer ég að þrífa,“ segir Valborg sem er með mikla hreinsunaráráttu. Valborg gefur börnunum að borða um fjórum sinnum á dag. Allt kostar þetta peninga.

„Þetta gengur nú bara furðuvel. Sjálf borða ég rosalega ódýrt og maður getur ekkert leyft sér að fara út að borða, enda hef ég engan tíma til þess. Peningurinn dugar alveg vel fyrir þessu.“

Valborg er strax farin að hugsa um að eignast fleiri börn en ítarlega var rætt við hana í Íslandi í dag í gærkvöldi og má sjá viðtalið í heild sinni hér að neðan.